Kuri uyu wa Gatandatu tariki ya 13 Kamena 2026, Abanyeshuri bahuriye mu muryango wa RPF Inkotanyi muri APRED NDERA, bifatanyije n’abarimu babo, bagiriye urugendo shuri rw’uburezi n’amateka mu nyubako ya CND.
Aha ni hamwe mu habereye urugamba rwo kubohora Igihugu cyacu cy’u Rwanda. Uru rugendo rwari rugamije kungura ubumenyi ku mateka y’u Rwanda, gusobanukirwa inzira yo kubohora Igihugu ndetse no gushimangira indangagaciro z’ubumwe n’ubudaheranwa.
Mu gusura CND, abanyeshuri bahawe ibisobanuro birambuye ku mateka y’igihugu cy’u Rwanda, by’umwihariko ku mateka mabi yaranze u Rwanda mu gihe cya Jenoside yakorewe Abatutsi muri Mata 1994, n’uruhare rw’inzego zitandukanye mu gushaka umuti w’amahoro arambye. Basobanuriwe uko CND yabaye ahantu h’ingenzi cyane ku Nkotanyi mu mateka y’igihugu, by’umwihariko mu gihe cy’urugamba rwo kubohora Igihugu.
Abanyeshuri banamenye uruhare rukomeye rw’Ingabo z’Inkotanyi mu guhagarika Jenoside no kubohora u Rwanda, biyemeza guharanira ubumwe n’amahoro. Ibisobanuro bahawe byabafashije gusobanukirwa uko urugamba rwo kubohora igihugu rwatangijwe, intego rwari rufite, n’icyo rwasigiye u Rwanda rw’uyu munsi.
Uru rugendo rwagize akamaro gakomeye kuko rwafashije abanyeshuri guhuza amasomo biga mu ishuri n’amateka nyakuri yabayeho. Banabonye umwanya wo kubaza ibibazo, gutanga ibitekerezo, no kungurana ubumenyi ku kamaro ko gukomeza kubaka u Rwanda rufite ubumwe, ubwiyunge n’iterambere.
Mu gusoza uru rugendo, ubuyobozi bw’ishuri n’abarimu bashimye imyitwarire myiza y’abanyeshuri n’ubwitange bagaragaje, basaba abanyeshuri gukomeza gusigasira amateka y’igihugu, kurwanya ingengabitekerezo ya Jenoside, no kuba intangarugero mu kubaka ejo hazaza heza h’u Rwanda.
Uru rugendo shuri rugaragaza ko APRED NDERA yiyemeje gutanga uburezi bufite ireme, butanga ubumenyi bwuzuye kandi bushingiye ku ndangagaciro z’igihugu.